وده هو الصح.. برود عندنا مش برد.. والبرود حقنا أفضل ألف مرة من الحمى والظما ومسراقة الكهرباء.. خلونا نهرب من أخبار الهم والغم اللي كلها مواعيد كذابة زي سفر الدناكل كل يوم باكر.. بس البرد يشتي وقاية والبرود يفتح الشهية.. واختيار ما يرقع البطن ويحمي البدن يكون كتير مهم! وأنا متيم بالدخن.. الدخن يا سالمين الدخن.. والدخن هو المسيبلي ومش السمسم زي ما كنت أنا فاكر!
في واحدة حرمة كانت تجي من الشيخ عثمان وتبيع أحسن أنواع الدخن.. طبعًا ما شي كما طبيخ الأم، لكن علينا وعلى الحاصل.. الدخن يا سالمين الدخن! شوفوا صورة الشيخ عثمان من الجو في بدايات نشأتها.. تشرح القلب.. كانت وكمان غيرها يجلسوا من صباح كل يوم قدام سوق البلدية الكبير بكريتر من صباح ربنا للعصر.. أحسن دخن.. وكمان في معاهم كدم.. ومخلم والتاني ذاك اللي نسيت اسمه من حق لحج.. شكله زي الكدم (ذكرت الاسم.. إنه الكدر)، ومن أحسن الحبوب البلدي.. المهم شل وفتي رشي مع سمن بلدي وإلا سليط جلجل.. ولبن.. وعسل، وفي ناس يخلطوا بينه تمر.. أيوه تمر زي حق فتة المخابيز.. وفتي رشي!
بعدين يا عزيزي محفوظ البقاء عليك وعلى الحلاية من حلويات عدن المنوعة، وفي منها هنا نامونة من الصور مش بطالة اتفرجوا عليها خاف تعجبكم.. ولو تجزع لعند أبو الحلوى وعاده الطبق حامي والحلوى ساخنة والبرود يا سلام سلم.. مع الحلوى لازم تكسر حلاوتها بالقهوة، وهي موجودة في محلات الحلوى الممتازة بين كل زغط وحافة.. وبس.. بكدا نكون سكهنا من الأخبار البايخة ورقعنا البطن وحمينا الجسم من برودة الجو حتى الناعمة منها اتقاءً من أي مرض أو علة.. وبكذا لازم يكون المكون الرئيسي للجلسة هو الدخن.. هو أيش؟ أيوه عليك نور.. هو الدخن.. المسيبلي.. الدخن الدخن يا سالمين الدخن.
